ആമസോണിനെയും ഫ്ലിപ്കാര്‍ട്ടിനെയും പറ്റിക്കുന്നവര്‍ ചെയ്യുന്ന കാര്യങ്ങള്‍

ഓണ്‍‍ലൈന്‍ ഷോപ്പിങ് സൈറ്റുകള്‍ ഉപഭോക്താക്കളെ പറ്റിച്ച നിരവധി സംഭവങ്ങള്‍ മാധ്യമങ്ങളിലൂടെ നമ്മള്‍ അറിയാറുണ്ട്. പക്ഷേ ഉപഭോക്താക്കളുടെ തട്ടിപ്പിന് ഇ കൊമേഴ്സ് സൈറ്റുകള്‍ വിധേയരാകുന്നുണ്ടോ? തീര്‍ച്ചയായും. അതും വന്‍കിട രീതിയില്‍ തന്നെ. ഇന്ത്യൻ ഇ-കൊമേഴ്സ് ഭീമനായ ഫ്ലിപ്കാർട്ടിനെ ഒരു വര്‍ഷത്തില്‍ താഴെ കാലം കൊണ്ട് ഒരു കൂട്ടം ഉപഭോക്താക്കള്‍ പറ്റിച്ചെടുത്തത് 1.56 കോടി രൂപയാണ്. ആമസോണില്‍ നിന്ന് 12 ലക്ഷം ഡോളര്‍ ( ഏകദേശം 8.18 കോടി രൂപ) തട്ടിയെടുത്തതിന് യുഎസിലെ ഇന്ത്യാനയില്‍ നിന്നുള്ള ദമ്പതികളെ ആറ് വര്‍ഷത്തെ തടവിനു വിധിച്ച സംഭവവും അടുത്തകാലത്തുണ്ടായി. ഇഷ്ടപ്പെട്ടില്ലെങ്കില്‍ ഉത്പന്നം തിരിച്ചുകൊടുക്കാം എന്ന ഇ കൊമേഴ്സ് കമ്പനികളുടെ വ്യവസ്ഥ മുതലെടുത്താണ് തട്ടിപ്പുകളെല്ലാം തന്നെ നടക്കുന്നത്. ഓണ്‍ലൈന്‍ ഷോപ്പിങ് സൈറ്റുകള്‍ കബളിപ്പിക്കെടുന്നത് എങ്ങനെയൊക്കെയെന്ന് നോക്കാം.

വ്യാജ ഓര്‍ഡറുകള്‍
ഓര്‍ഡര്‍ ചെയ്ത് വരുത്തിയ ഉത്പന്നത്തിനു കേടുപാടുണ്ടെന്നോ പ്രവര്‍ത്തന രഹിതമാണെന്നോ കളവ് പറഞ്ഞ് തിരിച്ചയക്കുന്നവരുണ്ട്.ഫലമോ ഉത്പന്നം അയയ്ക്കുന്നതിനുള്ള ചെലവ് കമ്പനിയ്ക്ക് നഷ്ടമാകും.
ഇത്തരം തട്ടിപ്പ് നടത്തുന്നവര്‍ക്ക് മറ്റൊരു ശീലവുമുണ്ട്. ഡെലിവറി ചെയ്ത പാക്കറ്റില്‍ കല്ലോ മണ്ണോ ഇഷ്ടികകട്ടയോ സമാനമായ പഴയ മോഡലോ കയറ്റിവച്ച് തങ്ങളെ പറ്റിച്ചുവെന്ന് കമ്പനിയില്‍ പരാതിപ്പെടും.തുക തിരികെ നല്‍കണമെന്ന് ആവശ്യപ്പെടും. അല്ലാത്തപക്ഷം കോടതിയെ സമീപിക്കുമെന്നും സോഷ്യല്‍ മീഡിയയിലൂടെ അപകീര്‍ത്തിപ്പെടുത്തുമെന്നുമൊക്കെ ഭീഷണിയും മുഴക്കും. ആദ്യ കാലത്തൊക്കെ ദുഷ്പേര് ഭയന്ന് പണമോ ഉത്പന്നമോ നല്‍കി തലയൂരുകയായിരുന്നു കമ്പനികള്‍ ചെയ്തിരുന്നത്. എന്നാല്‍ ഇത്തരം തട്ടിപ്പുകള്‍ വര്‍ധിച്ചതോടെ കമ്പനികള്‍ അടിസ്ഥാനതലത്തില്‍ വരെ അന്വേഷണം നടത്തി നിജസ്ഥിതി ഉറപ്പുവരുത്തിയ ശേഷമേ തുടര്‍നടപടി സ്വീകരിക്കൂ. പലതവണ റീഫണ്ട് നേടിയ അക്കൌണ്ടുകളെ അവര്‍ നിരീക്ഷണത്തിലാക്കിയിട്ടുമുണ്ട്.

ഫ്രീ ഷിപ്പിങ് നേടിയെടുക്കും
പല ഓണ്‍ലൈന്‍ ഷോപ്പിങ് സൈറ്റുകളും നിശ്ചിത തുകയ്ക്കുള്ള ഉത്പന്നങ്ങള്‍ക്ക് ഓര്‍ഡര്‍ കൊടുക്കുമ്പോഴാണ് ഷിപ്പിങ് ചാര്‍ജ് ഒഴിവാക്കുക. അതില്‍ കുറവാണെങ്കില്‍ ഉത്പന്നം അയയ്ക്കാനുള്ള ചെലവ് ഉപഭോക്താവ് വഹിക്കണം. ഇതൊഴിവാക്കാന്‍ ചില ഉപഭോക്താക്കള്‍ അധികമായി ഒരു ഉത്പന്നം കൂടി വെറുതെ ഓര്‍ഡര്‍ ചെയ്യും. അപ്പോള്‍ ഷിപ്പിങ്ചാര്‍ജ് ഒഴിവായി കിട്ടിയല്ലോ. ഓര്‍ഡര്‍ ഡെലിവറി ചെയ്യുമ്പോള്‍ ആവശ്യമില്ലാതെ ഓര്‍ഡര്‍ ചെയ്ത ഉത്പന്നം തിരികെ അയയ്ക്കും. വളരെ ലളിതമായ തട്ടിപ്പും കമ്പനികള്‍ക്ക് ഏറെ സാമ്പത്തികനഷ്ടം ഉണ്ടാക്കുന്നുണ്ട്.

കൊറിയര്‍ കമ്പനികളുടെ വക തട്ടിപ്പ്
പ്രാദേശിക കൊറിയര്‍ കമ്പനികള്‍ വ്യാജ ഓര്‍ഡറുകള്‍ നല്‍കും. ഉത്പന്നം കിട്ടായാല്‍ ഉടന്‍ അത് റിട്ടേണ്‍ ചെയ്യും. ഉത്പന്നം ഡെലിവര്‍ ചെയ്യുന്നതിന്റെയും തിരികെ അയയ്ക്കുന്നതിന്റെയും കമ്മീഷന്‍ കൊറിയര്‍ കമ്പനിക്കാരുടെ കീശയില്‍ വീഴും.

ക്യാഷ് ഓണ്‍ ഡെലിവറിയിലാണ് മുട്ടന്‍ പണി
കാഷ് ഓണ്‍ ഡെലിവറിയിലാണ് ഉത്പന്നം തിരികെ അയയ്ക്കുന്ന സംഭവങ്ങള്‍ അധികവും ഉണ്ടാകാറുള്ളത്. പതിനഞ്ച് മുതല്‍ ഇരുപത് ശതമാനം വരെയാണ് റിട്ടേണ്‍ റേറ്റ്. പക്ഷേ കമ്പനികള്‍ക്ക് അത് ഒഴിവാക്കാനുമാകില്ല. ആകെ വില്‍പ്പനയുടെ 40-45 ശതമാനം ക്യാഷ് ഓണ്‍ ഡെലിവറിയാണ്. ആരെയെങ്കിലും പറ്റിക്കുന്നതില്‍ മാനസിക സുഖം കണ്ടെത്തുന്നവരും ഓണ്‍ലൈന്‍ ഷോപ്പിങ് സൈറ്റുകള്‍ക്ക് തലവേദനയാണ്. ക്യാഷ് ഓണ്‍ ഡെലിവറിയുള്ള ഉത്പന്നങ്ങള്‍ ഇക്കൂട്ടര്‍ വെറുതെ ഓര്‍ഡര്‍ ചെയ്യും. ഡെലിവറിയ്ക്കായി വിളിക്കുമ്പോള്‍ ഫോണ്‍ എടുക്കില്ല. അങ്ങനെ അത് റിട്ടേണ്‍ പോകും.

ഡെലിവറി ബോയിയെ പോലും പറ്റിക്കും
കുറച്ച് കാലം മുമ്പാണ്,ഹൈദരാബാദില്‍ ആമസോണിനെയും ഫ്ലിപ്പ്കാര്‍ട്ടിനെയും പറ്റിച്ച ബന്ധുക്കളായ രണ്ട് വിദ്യാര്‍ഥികള്‍ പൊലീസിന്റെ പിടിയായി. അവരുടെ തട്ടിപ്പ് ഇങ്ങനെയായിരുന്നു. ഡെലിവറി ബോയിയില്‍ നിന്ന് പാക്കറ്റ് വാങ്ങി, ഡെബിറ്റ് കാര്‍ഡ‍് എടുക്കാനെന്ന വ്യാജേന പ്രതികളില്‍ ഒരാള്‍ വീടിനുള്ളിലേയ്ക്ക് പോയി. പാര്‍സല്‍ വളരെവേഗത്തില്‍ വിദഗ്ധമായി പൊട്ടിച്ച് അതിനുള്ളിലെ സാധനം എടുത്ത് സമാനതൂക്കത്തില്‍ മണല്‍ നിറച്ച ശേഷം കാര്‍ഡുമായി തിരികെയെത്തി. ഈ സമയമെല്ലാം കൂട്ടുപ്രതി സാധനവുമായി എത്തിയ ആളുമായി സംസാരിച്ച് നിന്നു. ഡെലിവറി ബോയ് മെഷീനിഷില്‍ കാര്‍ഡ് സ്വൈപ്പ് ചെയ്തെങ്കിലും പേയ്മെന്റ് നടന്നില്ല. തുടര്‍ന്ന് കൊണ്ടുവന്ന പാഴ്സല്‍ തിരികെ നല്‍കി ഡെബിറ്റ് കാര്‍ഡ് കൈപ്പറ്റി. പൊലീസ് ബുദ്ധിപൂര്‍വമായ അന്വഷണം നടത്തിയതുകൊണ്ടു മാത്രം യഥാര്‍ഥ പ്രതികള്‍ പിടിയിലായി. അല്ലെങ്കില്‍ പാവം ഡെലിവറി ബോയിയുടെ കാര്യം കഷ്ടത്തിലായേനെ.

ഇ കൊമേഴ്സ് കമ്പനികളുടെ മറുമരുന്ന്
ഓരോ ഉപഭോക്താവിന്റെയും ഷോപ്പിങ് ചരിത്രം വിശകലനം ചെയ്ത് തട്ടിപ്പുകാരെ തിരിച്ചറിയാനാണ് ഇ കൊമേഴ്സ് കമ്പനികളുടെ ശ്രമങ്ങള്‍ .അത്തരം ഉപഭോക്താക്കളെ പ്രത്യേക ലിസ്റ്റില്‍ ഉള്‍പ്പെടുത്തുന്നുണ്ട്. ഇവരെ നിയമത്തിന്റെ മുന്നില്‍ കൊണ്ടുവരാന്‍ സൈബര്‍ പൊലീസിന്റെ സഹായവും അവര്‍ ഉറപ്പാക്കുന്നു. ഉത്പന്നത്തിന്റെ പാക്കേജിങ്ങില്‍ മാറ്റം വരുത്തിയും വിവിധ വേരിഫിക്കേഷന്‍ മാര്‍ഗങ്ങള്‍ ഉപയോഗപ്പെടുത്തിയും തട്ടിപ്പുകാരെ പ്രതിരോധിക്കാനും കമ്പനികള്‍ ശ്രമിക്കുന്നുണ്ട്. ഓണ്‍ലൈന്‍ ഷോപ്പിങ് സൈറ്റുകളില്‍ തട്ടിപ്പ് നടത്തുന്നവര്‍ ഒന്നോര്‍ക്കുക. വളരെയെളുപ്പത്തിലും വേഗത്തിലും ഏറ്റവും കുറഞ്ഞ നിരക്കില്‍ ഉത്പന്നങ്ങള്‍ വാങ്ങാനുള്ള സാഹചര്യമാണ് ഓണ്‍ലൈന്‍ ഷോപ്പിങ് സൈറ്റുകള്‍ .വെബ്സൈറ്റിലൂടെ അനായാസം കൊടുക്കുന്ന ഓരോ ഓര്‍ഡറുകളും നിങ്ങളുടെ കയ്യിലെത്തിക്കാന്‍ ഒരുപാട് പേരുടെ അധ്വാനമുണ്ട്. അതിനു വില മതിക്കുക. ഉപഭോക്താവ് രാജാവാണ്, രാജാവ് ഒരിക്കലും തട്ടിപ്പുകാരനാവരുത്..

Leave a Reply

Your email address will not be published. Required fields are marked *

*